PANDA က ကူညီနိုင်ပါသည်။ သင့်အတွက် သို့မဟုတ် သင်သိကျွမ်းသူတစ်ဦးဦးအတွက် ဖုန်းဆက်ပါ။

အကူအညီ ရယူရမည့်အချိန်

ကိုယ်ဝန်ရှိခြင်း သို့မဟုတ် မိဘ စတင်ဖြစ်လာခြင်းသည် စိတ်လှုပ်ရှားရပြီး ပျော်စရာကောင်းရသလို တစ်ချိန်တည်းမှာလည်း အခက်အခဲများကိုလည်း ရင်ဆိုင်ရနိုင်ပါသည်။ အပြောင်းအလဲများအတိုင်း လိုက်ညှိနေရသည့်အခက်အခဲအချို့ ရှိခြင်းမှာ သဘာဝပင်ဖြစ်ပါသည်။ သို့သော်၊ သာမန်ဖြစ်နေကျ ကောင်းတစ်ခါ ဆိုးတစ်လှည့်အခြေအနေမှ ပိုပြီးဆိုးဝါးလာကာ ရက်သတ္တပါတ်နှစ်ပတ် သို့မဟုတ် ထို့ထက်ပိုပြီး ဖြစ်လာခဲ့ပါက အကူအညီတောင်းဖို့ အချိန်ကျပြီ ဖြစ်ပါသည်။

ကိုယ်ဝန်ဆောင်ချိန်နှင့် မွေးဖွားပြီးနောက် တစ်နှစ်ကြာကာလအတွင်း စိုးရိမ်သောကဖြစ်ခြင်းနှင့် စိတ်ဓာတ်ကျခြင်းတို့သည်ဖြစ်နေကျ ဖြစ်ပါသည်။

ကိုယ်ဝန်ဆောင် သို့မဟုတ် မိခင်ဖြစ်စ အမျိုးသမီး ငါးယောက်လျှင် တစ်ယောက်နီးပါးနှင့် ကိုယ်ဝန်ဆောင်စ ဇနီးရှိသော အမျိုးသားများ သို့မဟုတ် ဖခင်ဖြစ်စ အမျိုးသားများ ဆယ်ယောက်လျှင် တစ်ယောက်သည် ကိုယ်ဝန်ဆောင်ချိန်နှင့် မွေးဖွားပြီးနောက် တစ်နှစ်ကြာကာလအတွင်း စိုးရိမ်သောကဖြစ်ခြင်း သို့မဟုတ် စိတ်ဓာတ်ကျခြင်းကို တွေ့ကြုံခံစားရပါလိမ့်မည်။ ၎င်းသည် ကိုယ်ဝန်ဆောင်ချိန်(မမွေးမီ) သို့မဟုတ် မီးဖွားပြီး (ကလေးမွေးပြီး) တစ်နှစ်အတွင်း ဖြစ်နိုင်ပါသည်။ ‘ကိုယ်ဝန်ဆောင်ချိန်နှင့် မွေးဖွားပြီးနောက် တစ်နှစ်ကြာကာလ’ (‘perinatal’) ဆိုသည့်စကားလုံးသည် ကိုယ်ဝန်ဆောင်ချိန်နှင့် မွေးဖွားပြီးနောက် တစ်နှစ်တာကာလ နှစ်မျိုးစလုံးကို ရည်ညွှန်းပါသည်။

မီးဖွားပြီးနောက်ပိုင်းတွင်ဖြစ်သော စိတ်လွတ်ရောဂါ

မီးဖွားပြီးနောက်ပိုင်းတွင်ဖြစ်သော စိတ်လွတ်ရောဂါသည် ဖြစ်ခဲသော်လည်း မိခင်ဖြစ်စ ၁၀၀၀ လျှင် တစ်ယောက်မှ နှစ်ယောက်အထိ ဖြစ်တတ်သော ပြင်းထန်ဆိုးရွားသည့် ရောဂါတစ်ခုဖြစ်ပြီး မိခင်ရော ကလေးကိုပါ အန္တရာယ်ပေးနိုင်ပါသည်။ ၎င်းကြောင့် အမြဲတမ်းလိုလိုပင် ဆေးရုံတင်ရလေ့ရှိပါသည်။ ရောဂါလက္ခဏာများမှာ ရုတ်တရက်ပေါ်လာတတ်ပြီး စိတ်အပြောင်းအလဲများ ဖြစ်လွန်းခြင်း၊ အပြုအမူများ သိသိသာသာ ပြောင်းလဲလာခြင်းနှင့် မျက်မှောက်လောကနှင့် အဆက်ပြတ်လာခြင်းတို့ ပါဝင်နိုင်ပါသည်။

PANDA က ကူညီနိုင်သည့်နည်းလမ်းများ

သင်သည် သင်၏ စိတ်ခံစားမှု သို့မဟုတ် စိတ်ပိုင်းဆိုင်ရာ ကျန်းမာရေးအတွက် စိတ်ပူပန်နေရသော ကိုယ်ဝန်ဆောင် သို့မဟုတ် မိခင်ဖြစ်စအမျိုးသမီး ဖြစ်ပါက သို့မဟုတ် သင်သိကျွမ်းသူတစ်ဦးဦးသည် ထိုသို့သောသူ ဖြစ်နေပါက ကူညီပံ့ပိုးမှုရယူရန် အရေးကြီးပါသည်။ ကူညီပံ့ပိုးမှု စောစောရယူလေ၊ သင် စောစော သက်သာရာရနိုင်လေ ဖြစ်ပါသည်။

PANDA ၏ တစ်နိုင်ငံလုံးဆိုင်ရာ ကိုယ်ဝန်ဆောင်ချိန်နှင့်မွေးဖွားပြီးနောက် တစ်နှစ်ကြာကာလအတွင်း စိတ်ပိုင်းကျန်းမာရေးဆိုင်ရာ အကူအညီရယူရန် ဖုန်းလိုင်း (National Perinatal Mental Health Helpline) သည် မိခင်ဖြစ်စနှင့် ကိုယ်ဝန်ဆောင်အမျိုးသမီးများ အားလုံးကို အခမဲ့ ဆွေးနွေးအကြံပေးသည့် ဝန်ဆောင်မှု အရ ကူညီပံ့ပိုးပေးပါသည်။

ကျွန်ုပ််တို့၏ အဆင့်မြင့်မြင့် လေ့ကျင့်သင်ကြားထားပြီး တယ်လီဖုန်းဖြင့် ဂရုတစိုက်ဆွေးနွေးလမ်းညွှန်ပေးသူများက သင့်စိုးရိမ်ပူပန်မှုများကို လက်ခံနားထောင်ပြီးနာလန်ထူခြင်း၏ ပထမခြေလှမ်းများအတွက် သင့်အား ကူညီပေးပါလိမ့်မည်။

ဤအကြောင်းကို ပြောပြခြင်းမှာ အကောင်းဆုံးဖြစ်ပါသည်

ကိုယ်ဝန်ဆောင်ချိန်နှင့် မွေးဖွားပြီးနောက် တစ်နှစ်ကြာကာလအတွင်း စိုးရိမ်သောကဖြစ်ရခြင်းနှင့် စိတ်ဓာတ်ကျခြင်းတို့သည် ပြင်းထန်ဆိုးရွားသည့် ကျန်းမာရေး အခြေအနေတစ်ခု ဖြစ်သည်။ ၎င်းသည် မည်သည့် မိခင်ဖြစ်စ သို့မဟုတ် ကိုယ်ဝန်ဆောင် အမျိုးသမီးမှာမဆို ဖြစ်နိုင်ပါသည်။ ၎င်းအတွက် ရှက်နေစရာ လုံးဝမလိုပါ။ ထိုအကြောင်းကို ပြောပြရန် ပြဿနာ မရှိပါ။ အမှန်တကယ်တွင် သင်ပြောပြလိုက်ခြင်းက ပိုကောင်းပါသည်။

အခြားသူများအား သင်ရုန်းကန်နေရမှုများအကြောင်းကို ပြောပြခြင်း သို့မဟုတ် သင် အကူအညီလိုအပ်နေကြောင်းကို ဝန်ခံခြင်းသည် ပျော့ညံ့နေမှု၏လက္ခဏာ မဟုတ်ပါ။ ၎င်းက သင့်အနေနှင့် သင့်အတွက်နှင့် သင့်မိသားစုအတွက် အကောင်းဆုံး ဖြစ်စေချင်ကြောင်းကို ပြသသည်။

ကျွန်ုပ်တို့၏ အခမဲ့ တစ်နိုင်ငံလုံးဆိုင်ရာ ကိုယ်ဝန်ဆောင်ချိန်နှင့် မွေးဖွားပြီးနောက် တစ်နှစ်ကြာကာလအတွင်း စိတ်ပိုင်း ကျန်းမာရေးဆိုင်ရာ အကူအညီရယူရန် ဖုန်းလိုင်း (National Perinatal Mental Health Helpline)

1300 726 306 ကို

တနင်္လာနေ့မှ သောကြာနေ့ နံနက် ၉ နာရီမှ ညနေ ၇.၃၀ နာရီအထိ ဩစတြေးလျားနိုင်ငံ အရှေ့ပိုင်းစံတော်ချိန်/ဩစတြေးလျားနိုင်ငံ နွေရာသီစံတော်ချိန် ဖုန်းဆက်ပါ။

ပန်ဒါ (PANDA) ၏ နိုင်ငံလုံးဆိုင်ရာ အကူအညီဖုန်းလိုင်းကို သင့်ဘာသာစကားအပါအဝင် ဘာသာစကား များစွာဖြင့် ရပါသည်။

ပန်ဒါအကူအညီဖုန်းလိုင်းကို ဖုန်းခေါ်ဆိုသောအခါ၊ သင်သည် စကားပြန်လိုအပ်ကြောင်း ကျွန်တော်တို့အား သိစေရန် “၁” ကို ‌ နှိပ်ပါ။

သင့်ဖုန်းအား ဖြေကြားသောအခါ ဘာဖြစ်မည်နည်း။

ပန်ဒါမှ စကားပြန်တစ်ဦးကို စီစဉ်ပေးမည်ဖြစ်ပြီး ရရှိသည့်အခါ ကျွန်တော်တို့ သင့်အား ပံ့ပိုးပေးမည့်ကိစ္စကို စတင်လုပ်ပေးပါမည်။

စကားပြန်မရရှိနိုင်ပါက သင့်အား ကျွန်တော်တို့ ဖုန်းပြန်ခေါ်ပါမည်။

အရေးပေါ်အကူအညီ လိုအပ်ပါက သုံည သုံးလုံး (၀၀၀) သို့မဟုတ် အနီးပတ်ဝန်းကျင်ရှိ ဆေးရုံအရေးပေါ်လူနာဌာနကို ဖုန်းခေါ်ပါ။

ပန်ဒါ အကူအညီဖုန်းလိုင်း၏ ရုံးချိန်ပြင်ပ ပံ့ပိုးမှု လိုအပ်ပါက အသက်ကယ်ဖုန်းလိုင်း (Lifeline) ၁၃ ၁၁ ၁၄ ကို ဖုန်းခေါ်ပါ။